Hi!

Foto van ons woonstel blok in Discovery Gardens, 30 minute buite Dubai City Centre. Ek sal later meer fotos stuur.

Kan julle glo dis my dag 4 vir my hier in Dubai. En wat ‘n avontuur sover. Ek moet se, dit wat mens op TV sien en dit wat ek hier ervaar lyk werelde ver. Die argitektuur is uit die aard van die saak dieselfde, maar mens sien dit nie regtig hier van waar ons woon nie.

Ons bly tans in Flora Creek Apartments, dis soos ‘n hotel/woonstel. 1 Slaapkamer met kombuis, 1 badkamer, 1 gaste toilet en voorhuis.

Ek het Woensdag oggend 3:00am SA tyd en 5am Dubai tyd geland. Alles het goed gegaan deur doeane, die lughawe is net vrek groot. Hulle neem nie meer vinger afdrukke nie maar scan nou jou oe. Dis glo meer akkuraat as vinger afdrukke. Ek het omtrent 2 minute gewag vir my visa, baie vinniger in vergelyking met Percy se 4 ure toe hy hier geland het. Thanks Perc vir jou moeite J Mwa!!

Ek het maar lekker uitgepass op die bank toe Percy Woensdag oggend werk toe is. Ek het hom nie eers hoor inkom nie en my vrek geskrik toe hy my wakker maak. Die woorde van een van ons pastore het deur my kop gevlieg: “Help, die Filistyne is op ons!” Hier kan dit nie die Filistyne wees nie maar wel die FiliPyne! J

Percy het my toe geneem na die Deira City Centre, ‘n groot mall so 2 km van waar ons tans woon. Dis baie groot en ek het my verkyk aan al die ninjas, daar’s darem nie te veel nie. Die eerste ding wat ek natuurlik gekry het, prioriteit 1, was lugtyd vir my selfoon. So my eerste Arabiese woord was “Etisalat”, wat die lugtyd operateur is. Ek weet ook dat ek lugtyd moet koop by ‘n winkel genaamd “Minutes”.

Ons het toe by Columbo Café gaan eet, dis reg langs die Virgin (Richard Branson se brand) Megastore. En daar sien ek wraggies TV reekse wat jy kan aankoop, so uit die ou dae. Die van julle wat fans was van Airwolf en McGyver en graag die goeie ou dae wil herleef, laat my weet…

By Columbo Café het ons vir Ryan, die waiter ontmoet. Hy is in Filipyn wat al 2 jaar hier in Dubai bly. Percy se die Filipyne kan nie F se nie, so hulle vervang die F met ‘n P. So ons moet dan eintlik se “Pilipyne”. J. Ek het intussen weer na Columbo Café gegaan en het nou ‘n vriendelike gesig wat my naam ken. Hulle sukkel bietjie met die G in Magriet, so ek maak dit maar ‘n Amerikaanse Gh.

Die eerste dier wat ek gesien het was toe nie ‘n kameel nie, maar wel ‘n vlieg. En hier draai hulle nogsteeds so om mens soos in Suid Afrika.

Ons het intussen al na Festival Mall en Emirates Mall toe gegaan. Dis by Emirates Mall waar die ski oord is. Nog nie probeer nie. Dis in Emirates Mall waar ons ‘n Emirate met sy 8 vrouens gesien shopping doen het. Hierdie ouens het guts hoor. Vir meeste van julle mans in SA is 1 vrou te veel in ‘n mall. Julle sal maar moet kom leer hoe dit gedoen word!

Ons het gister gaan meubels soek by ‘n plek genaamd Ikea. Dis soortgelyk aan Joshua Door. Ons was ook by ‘n hardeware winkel soortgelyk aan Builders Warehouse. Toe is ons na ons woonstel toe om te gaan meet. Hieronder sien julle fotos van waar ons gaan bly. Ons ontdek toe ‘n mall so 2 km van ons woonstel en wat ‘n nice mall. Die argitektuur is Morokken, ek dink, maar daar is baie nice winkels. Ook ‘n gym waar vroue kan gym. Ek’s baie bly daaroor.

Daar’s ook ‘n baie nice sport winkel. Baie van julle weet dat ek hou van ‘n rooi Ferrari, so jy kan jouself indink hoe my hart geklop het toe ek ‘n bloedrooi mountain bike sien met ‘n Ferrari bag op. “As ek nie ‘n Ferrari motor kan kry nie sal ‘n fiets beslis doen”, of so het ek gedink. 10,000 Dirhams vir die fiets met die Ferrari bag op. Soorgelyk aan R25,000!!!! Nee dankie, ek sal maar vir my ‘n gewone fiets kry, hom rooi spray en ‘n Ferrari sticker by Bokburg flooimark gaan kry en opplak!

Gepraat van flooimark, ons was gisteraand by Dragon Mart. Een $#%$$&^% groot flooimark buite Dubai. Dis seker waar SA aan hulle idees gekom het. Probleem is net dat daar geen aircon is nie. Ons was nie baie lank daar nie.

Ons het ook die wereld se grootste plasma skerm by Plug-Ins gesien. 103 Inches – 130,000 Dirhams = R350,000. Hulle gooi darem vir jou ‘n gratis massage stoel in…

Vriende, tot later dan! Ek moet regmaak, Percy wil weer die winkels invaar… (Hy soek ‘n playstation game vir ons PS3… Lindi, eat your heart out!!)

Lief vir julle en mis julle baie!

Namens die Fick gesin (Of, as jy ‘n Pilipyn is, die “P”ick gesin… hehehehe)

Griet.